Ágúst Sigurðsson. Ljósmynd: RML/MAR
Ágúst Sigurðsson hefur verið skipaður forstöðumaður nýrrar stofnunar, Lands og skógar, sem tekur til starfa um áramótin. Þetta tilkynnti matvælaráðherra, Svandís Svavarsdóttir, nú fyrr í dag.
Ágúst hlaut doktorsgráðu í erfðafræði frá sænska Landbúnaðarháskólanum í Uppsölum árið 1996 og útskrifaðist með B.Sc. gráðu frá Landbúnaðarháskólanum á Hvanneyri árið 1989.
Ágúst var sveitarstjóri Rangárþings ytra frá árinu 2014 til 2022 og var rektor við Landbúnaðarháskóla Íslands frá árinu 2004 til 2014 þar sem hann stýrði m.a. sameiningu Landbúnaðarháskólans á Hvanneyri, Rannsóknastofnunar landbúnaðarins og Garðyrkjuskóla ríkisins. Þá starfaði Ágúst sem landsráðsnautur í búfjárerfðafræði og hrossarækt hjá Bændasamtökum Íslands frá árinu 1996 til 2004.
Ágúst hefur setið í stjórnum, ráðum, nefndum og hópum tengdum meðal annars landbúnaði, landgræðslu, hrossarækt og háskólamálum. Hann hefur ritað fjölda vísindagreina í alþjóðlegum ritrýndum vísinda- og ráðstefnuritum ásamt greinum í fagtímarit og blöð.
Starfsfólk Landgræðslunnar óskar nýskipuðum forstöðumanni Lands og skógar til hamingju með starfið. Sameining Landgræðslunnar og Skógræktarinnar er verkefni næstu vikna og mánaða og mikilvægt að vandað verði til allra verka og að vel takist til.
