Síðast uppfært: Miðvikudagur, 26. ágúst 2009 11:26 Föstudagur, 28. nóvember 2008 13:04

Binding kolefnis  

Landgræðslan hóf mælingar á kolefnisbindingu á landgræðslusvæðum árið 1998.

Síðari hluta árs 2006 ákvað umhverfisráðuneytið að velja landgræðslu sem mótvægisleið til að hamla gegn vaxandi styrk gróðurhúsalofttegunda í andrúmsloftinu. Í framhaldi af því ákvað Landgræðsla ríkisins að setja upp kerfi mælireita á öllum landgræðslusvæðum til að mæla kolefnisforða í gróðri og jarðvegi. Kerfið er byggt upp á sama hátt og það kerfi sem Skógrækt ríkisins notar og er alþjóðlega viðurkennt. Þessar mælingar hófust árið 2007 og lokið verður við að mæla kolefnisbindingu í landgræðslusvæðum árið 2011, en þá þarf að skila inn lokaskýrslu um þessar mælingar. Alls verða mældir um 1000 reitir.

Þessar mælingar eru forsenda þess að kolefnisbinding í landgræðslusvæðum verði viðurkennd sem frádráttur frá losun Íslands á gróðurhúsalofttegundum. Þær mælingar sem nú liggja fyrir benda til þess að meðalbinding sé um 2 tonn af CO² á hektara á ári. Sé núverandi framkvæmdahraða haldið má ætla að við lok árs 2011 verði búið að græða upp um 135 þúsund hektara frá og með viðmiðunarárinu, sem er 1990. Árleg binding í þeim svæðum verður því um 270 þúsund tonn sem er um 5% af losun Íslands 2005 og verðmæti tæpar 600 millj. kr. miðað við að verð á hvert bundið tonn sé 20 USD og gengi 110.

Á myndunum eru starfsmenn Landgræðslunnar að vinna að kolefnismælingum/GS.